ការសាងសង់ទីលាន
ទីលានបាល់ទាត់ថ្មីចំនួន ៣ លេចរូបរាងក្នុងខេត្តក្រចេះ ក្នុងនោះ ១ទីលានបានសាងសង់រួចរាល់ និងពីរទៀតកំពុងបន្តសាងសង់នោះមាន៖
១.ទីលានសាលាបឋមសិក្សាអញ្ចាញ ស្ថិតក្នុងឃុំដារ ស្រុកចិត្របុរី ជាគម្រោងរបស់មន្ទីរអប់រំយុវជន និងកីឡាខេត្ត
២.ទីលានអនុវិទ្យាល័យគោលាប់
សមិទ្ធិផលដ៍ល្អឯករបស់ខេត្តក្រចេះ ដែលជាគម្រោងរបស់សហព័ន្ធកីឡាបាល់ទាត់កម្ពុជា និងក្រសួងអប់រំយុវជននិងកីឡា ដែលមានទីតាំងក្នុងឃុំគោលាប់ស្រុកចិត្របុរី។ ទីលាន គោលាប់បានប្រកួតផ្លូវការលើកដំបូងរវាងក្រុមបាល់ទាត់យុវជនក្រោម១៨ឆ្នាំ ក្រចេះ និងភ្នំពេញក្រោន។ ជាលទ្ធផលយុវជនភ្នំពេញក្រោនក្រោម១៨ឆ្នាំយកឈ្នះក្នុងលទ្ធផល ៥ទល់១។
៣.ទីលានសាលាបឋមសិក្សាត្រពាំងឈូក
ជាអំណោយរបស់អង្គការសប្បុរសជនជប៉ុន ក្រោមកិច្ចខិតខំប្រឹងប្រែងរបស់ថ្នាក់ដឹកនាំខេត្តក្រចេះ ដើម្បីស្វែងរកជំនួយផ្សេងៗមកអភិវឌ្ឍវិស័យកីឡាខេត្ត
៤.ផែនការជួសជុលកន្លែងទស្សនិកជន ក្នុងទីលានបាល់ទាត់ខេត្ត
តាមប្រភពហ្វេសបុកលោក Kreim Marady បង្ហាញពីផែនការជួសជុលកន្លែងអង្គុយរបស់អ្នកទស្សនា ដែលថ្នាក់ដឹកនាំខេត្តបានស្នើសុំទៅអង្គការសប្បុរជនជប៉ុនដើម្បីជួយ សាងសង់ថ្មី។
ការប្រកួតបាល់ទាត់
ពានរង្វាន់យុវជនថ្នាក់ជាតិអាយុក្រោម ១៨ ឆ្នាំ និង១៦ឆ្នាំ
ក្រុមបាល់ទាត់អាយុក្រោម ១៨ឆ្នាំខេត្តក្រចេះបានឡើងដល់វគ្គ ៤ក្រុមជាលើកទី ២ក្នុងការប្រកួតពានរង្វាន់ជម្រើសជើងឯកថ្នាក់ជាតិអាយុក្រោម១៨ឆ្នាំ។ កាលពីរដូវកាលឆ្នាំ ២០១៩ ក្រចេះទទួលបានចំណាត់ថ្នាក់លេខ៣។ ដោយឡែកយុវជនអាយុក្រោម ១៦ឆ្នាំ មិនទទួលបានលទ្ធផលល្អនោះទេ ដោយបានធ្លាក់នៅជុំទី២ នៃការប្រកួត។
ពានរង្វាន់ថ្មគ្រែសង្ក្រាន្ត
ការប្រកួតបាល់ទាត់ពានរង្វាន់ថ្មគ្រែសង្រ្កាន្ត ផ្តួចផ្តើមរៀបចំដោយព្រះតេជគុណ យិន ចាន់ធា ព្រះវិន័យធរអនុគុណស្រុកចិត្របុរី និងជាព្រះចៅអធិការវត្ត បញ្ចសិលាថ្មគ្រែបានចាប់ផ្តើមពីថ្ងៃទី ២២ មីនា គ្រោងបញ្ចប់ថ្ងៃ ០៥ មេសា ប៉ុន្តែដោយសារបញ្ហាជំងឺ កូវីត១៩ ពានត្រូវពន្យាពេលរហូតដល់ថ្ងៃ ២០សីហា ឆ្នាំ២០២០ ជាថ្ងៃផ្តាច់ព្រ័ត្រ។
នេះជាពានរង្វាន់កំរិតមហាជនតែមួយគត់ក្នុងខេត្តគិតត្រឹមខែសីហា ឆ្នាំ២០២០។ ម្ចាស់ជើងឯកបានទៅលើក្រុមយុវជនបរិស្ថាន ជើងឯករងបានទៅក្រុម សេះសសន្តិភាពវត្តថ្មគ្រែ និងលេខ៣បានទៅលើក្រុម កាប៉ូអេហ្វស៊ី។
ការប្រកួតមិត្តភាពរបស់អតីតសិស្សវិទ្យាល័យព្រះកុសមៈឆ្នាំ២០០៦
រយះពេល៣ថ្ងៃ ក្នុងកម្មវិធីសង្គម និងកីឡា ក្រុមកីឡាអតីតសិស្សកុសម:ឆ្នាំ១៩៩៦ ដែលភាគច្រើនកំពុងប្រកបការងារ នៅទីក្រុងភ្នំពេញបានប្រកួតមិត្តភាពជាមួយក្រុមបាល់ទាត់វ័យចំណាស់ និងក្រុមបាល់ទាត់ Kratie FC ។ គោលបំណងសំខាន់នៃកម្មវិធីគឺ រួមចំណែកបំផុសវិស័យកីឡា រឹតចំណងសាមគ្គីភាព និងមិត្តភាពរវាងយុវជនជំនាន់មុន ដើម្បីជាគំរូនៃគំនិតទៅថ្ងៃក្រោយសម្រាប់យុវជនបច្ចុប្បន្ន។
