ប្រវត្តិ

ក្រុមបាល់ទាត់ KRATIE FC បង្កើតឡើងនៅក្នុងឆ្នាំ២០១២។ ក្រោមការបំផុសចលនាកីឡាពីមន្ទីរអប់រំយុវជន និងកីឡា ដោយលើកទឹកចិត្តដល់អ្នកស្រលាញ់បាល់ទាត់វ័យចំណាស់បានចូលរួមលេងកីឡាបាល់ទាត់។ កំឡុងពេលចាប់ផ្តើមដំបូងគឺមានសមាសភាពចម្រុះមកពី ស្ថានប័នមីក្រូហិរញ្ញវត្ថុ ធនាគារ អាជីវករលក់ដូរ កងរាជអាវុធហត្ថ និង មន្រ្តីរាជការដែលសាម៉ីមន្ទីរខ្លួនមិនមានក្រុមបាល់ទាត់បានព្រមព្រៀងគ្នារៀបចំជាក្រុម ដើម្បីចូលរួមជាមួយក្រុមបាល់ទាត់វ័យ ចំណាស់ ផ្សេងទៀតរបស់មន្ទីរជុំវិញខេត្តដូចជា មន្ទីរអប់រំ មន្ទីរសុខាភិបាល និងមន្ទីរសង្គមកិច្ច និងគ្រូវិទ្យាល័យទីរួមខេត្ត។ ក្រោយមកដើម្បីបានចូលរួមក្នុងការប្រកួតនានា ក្រុមបានរៀបចំក្រុមយុវជនដែលជាសិស្ស និស្សិត អាជីវករ ដែលមានវ័យចាប់ពី១៧ឆ្នាំឡើងទៅមានឪកាសបានចូលលេងកីឡាបាល់ទាត់។ នាបច្ចុប្បន្នក្រុមបានរៀបចំបន្ថែមឈុតថ្នាលអាយុក្រោម ១៤ ឆ្នាំ ឈុតយុវជនអាយុ ១៩ ឆ្នាំ និងឈុតធំ ដើម្បីអោយស្របនឹងបាល់ទាត់ថ្នាក់ជាតិ ដែលតែងមានការប្រកួតប្រជែង។ យើងមានបំណងរៀបចំឈុតអាយុក្រោម ១៦ឆ្នាំថែមទៀត ដែលបច្ចុប្បន្ន យុវជនទាំងនោះភាគច្រើនគ្មានក្រុមលេង និងមានឱកាសបង្កើនសមត្ថភាពពួកគាត់ក្នុងការប្រកួតនោះទេ។​ ប៉ុន្តែដោយកត្តាធនធានថវិកា និងសំភារះ យើងមិនអាចធ្វើកិច្ចការងារនេះបានទេ ទោះបីយើងមានធនធានមនុស្សជួយលើកិច្ចការងារនេះក្តី។

បេសកកម្មរបស់ក្រុម

កីឡាករគ្រប់រូបទាំងវ័យចំណាស់ និងយុវជនមានការរីករាយក្នុងជីវិតតាមរយះការលេងកីឡាបាល់ទាត់ និងសកម្មភាពសង្គមផ្សេងៗរបស់ក្រុម។